संपादक : संतोष श्रीमंतराव तांबे | RNI: MHMR/2022/87034
शहरातील रेल्वे स्थानकावर हरवलेल्या एका विसरभोळ्या तरुणाला आऊसाहेब सेवा प्रतिष्ठान संचलित “आपुलकी वस्तीगृह” याने खरी माणुसकी दाखवत ऊब दिली. दोन दिवस सुरक्षित आश्रय मिळाल्यानंतर त्या मुलाला त्याच्या आई, मावशी व भावाच्या ताब्यात सोपविण्यात आले.
स्थानकावर प्रवाशांच्या नजरेस हा २०-२१ वर्षांचा मुलगा चाचपडताना आला. प्रवाशांनी तात्काळ रेल्वे पोलिसांना माहिती दिली. चौकशीत तो हरवलेला असल्याचे स्पष्ट झाले. घरच्यांशी संपर्क साधला असता ते दोन दिवसांनी घेण्यासाठी येणार असल्याचे सांगितले. त्या दरम्यान त्याच्या राहण्याची सोय नसल्याने उपनिरीक्षक शिवहरी सानप व सहायक उपनिरीक्षक रेल्वे सुरक्षा बल, यांनी आऊसाहेब सेवा प्रतिष्ठानच्या संस्थापक अध्यक्षा डॉ. दिव्या पाटील यांच्याशी संपर्क साधला. त्यांच्या माध्यमातून त्या मुलाचा “आपुलकी वस्तीगृहात” प्रवेश करून घेण्यात आला.
दोन दिवसांत त्याला मिळालेल्या प्रेमळ वातावरणाचा परिणाम एवढा झाला की, जेव्हा आई, मावशी व भाऊ त्याला न्यायला आले, तेव्हा मुलगा भावुक होऊन म्हणाला, “मला इथेच राहायचं आहे, दीदींच्या जवळच.” त्याचे हे निरागस शब्द ऐकून सर्वांच्या डोळ्यांत अश्रू आले.
या वेळी पोलिस निरीक्षक अशोक भंडारी, ज्ञानेश्वर सोनार, उपनिरीक्षक शिवाजी उगले, हेडकॉन्स्टेबल भीमराव राठोड तसेच आऊसाहेब सेवा प्रतिष्ठानचे सचिव ज्ञानेश्वर देवडे पाटील उपस्थित होते. आपुलकी वस्तीगृहाने पुन्हा एकदा माणुसकीचा आदर्श घालून दिला आहे.