संपादक : संतोष श्रीमंतराव तांबे | RNI: MHMR/2022/87034
तालुक्यातील श्री.सरस्वती भुवन प्रशाला बिडकीन येथे पूर्व माध्यमिक विभागात साने गुरुजी कथामालेत प्रसिद्ध कवी, ख्यातनाम साहित्यिक लक्ष्मण खेडकर यांनी विद्यार्थ्यांना *धडपडणारी मुले*, धिटपणा यांसारख्या, प्रेरणादायी कथा सांगून खिळवून ठेवले.कवी लक्ष्मण खेडकर यांनी अतिशय ओघवत्या भाषाशैलीत व अत्यंत प्रभावी पद्धतीने कथा सादर केल्या. कथा ऐकताना विद्यार्थी अतिशय तल्लिन झाले होते.
कार्यक्रमाच्या अध्यक्षस्थानी प्रशालेचे मुख्याध्यापक धर्मेंद्र येवले, प्रभारी पर्यवेक्षक राजू शिंदे, कथामाला विभागाचे प्रमुख ज्ञानेश्वर चाटुपळे, तुषार अहिरे उपस्थित होते. कार्यक्रमाच्या सुरुवातीला साने गुरुजी यांच्या प्रतिमेचे पूजन करण्यात येऊन पुष्पहार अर्पण करण्यात आले. यानंतर प्रशालेच्या संगीत शिक्षिका संध्या शिंदे व स.भु.गीत मंचाने अतिशय सुमधुर आवाजात "खरा तो एकची धर्म... जगाला प्रेम अर्पावे" ही प्रार्थना सादर केली. प्रशालेचे मुख्याध्यापक धर्मेंद्र येवले यांनी साने गुरुजी कथामालेच्या आयोजनाची भूमिका विशद केली.
कथामालेच्या प्रभावी सादरीकरणानंतर कवी लक्ष्मण खेडकर यांनी "झाडाला फुटले पाय", "पुस्तकातील नको सर, थोडं बाहेरचे शिकवा" व बाप या स्वरचित कविता सादर केल्या. यानंतर कवी लक्ष्मण खेडकर यांनी "लिहिते व्हा" या उपक्रमांतर्गत विद्यार्थ्यांना कथा व कविता कशा लिहाव्यात, कथा लिहिताना कोणती काळजी घ्यावी याविषयी सविस्तर मार्गदर्शन केले. कवी लक्ष्मण खेडकर यांचा परिचय ज्ञानेश्वर चाटुपळे यांनी तर सूत्रसंचालन व आभारप्रदर्शन तुषार अहिरे यांनी केले. कार्यक्रम यशस्वी करण्यासाठी सर्व शिक्षक शिक्षिका शिक्षकेत्तर सहकारी यांनी प्रयत्न केले.